TRASLADO DE SERVIZO DE COMEDOR E MADRUGADORES.

Debido ao mal estado do edificio usado actualmente para dar o servizo de comedor e madrugadores, con graves deficiencias sanitarias e con falta de mantemento, vémonos na obriga de trasladar os citados servizos por orde da Conselleira de Educación e Comedores Escolares.

A nova localización elixida pola Consellería de Educación para dar o servizo situarase dentro do edificio do colexio. O sábado 22 de decembro, segundo infórmanos Dirección, procederase ao comezo das obras para o acondicionamento do novo espazo, este será na planta baixa do centro, fronte ás aulas de infantil, uniranse dúas aulas (antiga aula de informática e a aula actual de música) e colocarán un pequeno oficce. Estas obras trasládannos que se farán no menor prazo posible, tentando que o novo espazo este listo para a segunda ou terceira semana de Xaneiro.

Pola nosa banda como ANPA queremos comunicarvos que cremos que os/as nosos/as fillos e fillas van saír gañando co cambio de espazo, xa que a situación era insostible, pero pola nosa banda agora comeza unha nova loita para conseguir que esta localización "temporal" non pase a ser definitiva, e dunha vez por todas alguén se faga cargo do edificio anexo ao centro e rehabiliten ou constrúan un novo, onde os/as nosos/as fillos e fillas teñan un espazo digno onde comer a diario e poder devolverlle ao colexio a súa aula de música.

CAMBIO DE PROFESORADO NA ACTIVIDADE DE DEBUXO

Por motivos persoais Mari Luz, a actual profesora de debuxo ten que deixar de impartir esta actividade no noso centro, dende aquí queremos darlle as grazas por todos estes anos compartidos cos nenos e nenas do Sanjurjo e desexarlle o mellor nesta nova etapa.

Informarvos que a partir de Xaneiro a actividade de debuxo será impartida, nos mesmos días e horario habitual por dúas novas profesoras, Angeles (luns e xoves) e Yosune (martes) ámbalas dúas pertencentes a cooperativa artística Plano Pementa. 

Deixámosvos aquí a ligazón á súa web con todo a información sobre a cooperativa artística Plano Pementa.

ELEXIR XOGUETES NON É UN XOGO

Como xa sabedes este ano puxemos en marcha en colaboración co centro e a OMIC, unha campaña de concienciación a prol dos xogos e xoguetes educativos non sexistas e non violentos.

Editamos un marcapáxinas cun decálogo cos aspectos a ter en conta para educar en igualdade e organizamos as seguintes actividades:

20 de Decembro de 2018 16.30h-17.30h

Charla "Xoguetes para ser iguais" 

Obradoiro infantil de creación de xoguetes de refugallo (actividade paralela para nenos e nenas). Este obradoiro será impartido pola OMIC para facilitar a participación das familias na charla.

É preciso inscribirse tanto na charla como no obradoiro a través do seguinte formulario: https://docs.google.com/forms/d/e/1FAIpQLSccvhkttmUpd7tZOH64Ffccc9Fm_40vsu52eU_6uMdTTYVGug/viewform?usp=sf_link

20 de Decembro de 2018 17.30h-18h

Merenda en comunidade.
Despois da charla e obradoiro, traede algo de merendar para compartir.

10,12,17 de Decembro de 2018. 16h-17.30h   

12,14 de Decembro de 2018. 9h-10h

Recollida de Xoguetes para doar a Casa dos Xoguetes. 

Se queredes axudar na recollida, revisión e clasificación de xoguetes, tanto nenos/as como nais e pais, so tendes que vir o local da ANPA os días marcados para a recollida, esperámosvos!

Renovación actividades Deporte no Centro

No mes de decembro os nenos e nenas que están inscritos nas escolas do programa Deporte no centro (Baloncesto, Patín, fútbol e ximnasia rítmica) deberán renovar a inscripción e facer os pagos das cotas correspondentes para a súa continuación no mes de xaneiro.

Lembrade que os nenos e nenas que se incorporen por primeira vez aos programas, a excepción dos beneficiarios/as de beca de comedor, deben de abonar o seguro da actividade. (4 €).

As cotas do programa Deporte no Centro de xaneiro a maio 2019 son as seguintes:

FAMILIAS DE…..	COTAS  (xaneiro a maio 2019)
1 Fillo/a	20,00 €  por cada actividade
2 Fillo/as	16,00 €  por cada actividade e fillo/a
3 Fillo/as	14,00 €  por cada actividade e fillo/a
Máis de 3 fillo/as	12,00 € por cada actividade e fillo/a

Para este novo período manteranse as becas igual que ata de agora para os nenos que teñan concedida a beca municipal de comedor escolar.

Podedes facer a renovación o luns 10 (de 16 a 17.30h), mércores 12 (de 9 a 10 e de 16 a 17.30h) venres 14 (de 9 a 10h) e luns 17 (de 16 a 17:30h).

Como os pagos son en efectivo pedímosvos que procuredes traer o importe exacto para axilizar o proceso e falicitarnos o traballo.

MENÚ DECEMBRO E AMPLIACIÓN DE HORARIO DE RECOLLIDA

Informámosvos que dende esta semana o horario de recollida na primeira quenda ampliarase de 15:15 a 15:20, dando eses 5 minutos de marxe as familias para a recollida, rogámosvos sexades puntuais, pois a partir das 15:20 xa non haberá ninguén no portalón nin se atenderá o telefonillo.

Menú comedor escolar mes de Decembro

RESULTADO ENQUISA DE DETECCIÓN DE NECESIDADES

Aqui deixámosvos o informe cos resultados da enquisa de necesidades, moitas grazas a todas e todos pola vosa colaboración e o voso tempo.

INFORME RESULTADO DA ENQUISA DE NECESIDADE

CAMPACOLE NADAL 2018

Aqui deixámosvos toda a información sobre o campamento de Nadal " campacole" organizado pola federacion Provicial de Anpas e subvencionado polo Concello. Este Nadal o campamento non poderá ser no noso cole, pero por solicitar ser sede decidiuse fusionalo co centro máis proximo (CEIP Curros Enríquez) para unha mellor optimización de recursos. Por esa razón o alumnado do noso centro tera preferencia para realizar a inscrición os días 3, 4 e 5 de Decembro xunto co alumnado do CEIP Curros Enríquez no ANPA do mesmo de 9:15 a 9:45 e de 16:00 a 16:30.

Nesta ligazón podedes consultar o diptico con toda a información detallada.

RESUMO REUNION XUSTIZA SOCIAL E COIDADOS MARTES 20 DE NOVEMBRO

Onte tivemos a reunión con Silvia Cameán da Concelleira de Xustiza social e coidados do Concello da Coruña, os temas que tratamos foron os demandados polas familias que conformades esta ANPA, a través das vosas suxestións e enquisas. A continuación facémosvos un resumo do acordado:  

 1-A concelleira infórmanos que xa está encargado o traballo a mantemento para o arranxo da zona acordoada, na entrada ao centro. En canto chegue o material o instalarán. Quedará pendente o resto do perímetro xa que a incidencia que tiñan e só relativo os espazos entre muro e verxa onde están as xardineiras. 

2- Respecto ao cambio do peche, nos informa que está contratado o cambio de 33 módulos, quedando algún sen cambiar que acometerase o ano que ben. Solicitámoslle que empecen pola zona de infantil e aquelas que teñan maior perigo de seguridade. 

3- Respecto o estado do pavillón azul, enviará a edificación a facer un informe técnico do estado xeral para acometer os arranxos necesarios.  Explicounos que fai un anos a Xunta e o Concello acordou repartirse os centros de ensino para acometer o mantemento dos mesmos polo que quedo unas competencias municipais as pequenas actuacións e limpezas deixando a Xunta a obra nova e grande obra de mais de 100.000 euros. 

4- Van estudar o pintado da pista azul para que non tinxa. 

5- Respecto o edificio de comedor, pasaranos un informe elaborado por rexeneración urbana que explica que non é susceptible de reforma polo custe que isto suporía e que proponse o seu derribo e nova construción, para que o presentemos na Xunta xa que sería a Xunta quen debería acométela. 

6- Solicitamos unha limpeza a fondo do comedor, así como unha limpeza extra os luns antes de que chegue o alumnado a madrugadores da zona de filas e entrada ao comedor. 

7- Respecto ao noso patio, nos confirma que o feito que o concello apoie o proxecto non vai en detrimento das obras de mantemento necesarias, xa que os orzamentos son totalmente diferenciados pertencendo a capítulos de gasto diferentes, polo que a concellería de educación si dispón de un orzamento anual para actividades de participación e espera retomar as propostas acordadas para acometer. Non pode ir contra o orzamento anual ninguna obra, senón actividades participativas ou instalacións acompañadas de obradoiros de participación, por exemplo instalación de canastras, rocódromo ou adquisición de xogos acompañados de obradoiros participativos e/ou de sensibilización do uso igualitario do patio.

8- A concelleira pregunta polo acordado en Xuño de instalar o rocódromo e informa que nos emitirá un informe dun técnico municipal para poder acometer a súa instalación con todas as garantía. Quedou en consultar ao equipo técnico a proposta remitida xa en xuño para a implementación do rocódromo.

9- Solicitamos a concelleira cambiar de ubicación os cubos de lixo, a poder ser fora da entrada ao centro.

10- Solicitamos a concelleira o arranxo das beiraruas rotas na zona de infantil

11- Queda coa incidencia de que non funciona o telefonillo do centro e comprobará o estado da mesma remitida por dirección. 

AVISO ACTIVIDADES PAVILLÓN

Acábannos de informar desde a Federación Galega de Deporte que hoxe xoves 15 e mañá venres 16 o pavillón permanecerá pechado por traballos de pintura, as actividades trasladaranse aos patios exteriores do colexio. Sentimos as molestias.

FIN DE OBRAS PAVILLÓN DEPORTIVO

Informámosvos que a partir de hoxe luns 12 de novembro o pavillón xa esta aberto, co cal as actividades extraescolares xa poden impartirse no seu espazo habitual. Grazas pola vosa paciencia e comprensión.